Munaasabadani oo ay soo qaban qaabiyeen Qeybaha kala duwan ee bulshada Soomaaliyeed ee ku dhaqan dalkani kenya ayaa waxay ahayd mid lagu soo dhaweynayay Wafdi uu hor kacayay Madaxweyne ku xigeenka dowlad gobaleedka Galmudug Maxamed Xashi Cabdi Carabeey oo howlo shaqo u yimid Kenya.
Munaasabada ayaa waxaa ka qeyb galay Mas’uuliyiin ka tirsan dowlada Soomaaliya,Wasiiro iyo Xildhibano ka tirsan Baarlamanka Galmudug iyo Xubno matalayay Qeybaha Kala duwan ee bulshada ku dhaqan magalada Nairobi oo isugu jiray Siyaasiyiin Ganacsato waxgarad Culimaa’udiin,ururada haweenka iyo kuwa dhalinyarada ee Xaafada Islii.
Waxaana munaasabada oo lagu soo bandhigay Suugaan kala duwan oo isugu jiray Gabayo iyo heeso ay halkaasi ka qaadeen qaar ka mid ah fanaaniinta Soomaaliyeed ee ku nool magaalada Nairobi.
Mas’uuliyiintii kala duwaneed ee munaasabada soo dhaweynta ah ka hadashay ayaa balan qaaday inay sii laba jibaarayaan garab istaaga iyo taageerada dowlada Gobaleedka Galmudug.
Madaxweyne ku xigeenka Galmudug Maxamed Xashi Cabdi Carabeey oo gaba gabdii Khudbad dheer ka jeediyay munaasabada ayaa waxa uu kaga warbixiyay Caqabadihii ka hor yimid iyo waxyaabihii u qabsoomay tan iyo intii la dhisay dowlad gobaleedka Galmudug.
Madaxweyne ku xigeenka oo soo hadal qaaday Arrimaha dib u heshiisiinta ayaa waxa uu shaaca ka qaaday in dhawaan shir dib u heshiisiineed uu beelaha wada dega Galmudug uga furi doonaan Galinsoor,isagoona dhanka kale ka dhawaajiyay inay heshiis la galeen culimaa’udiinka Ahlu Sunna waljameece ee gobalada dhaxe.isla markaana dhawaan dhuusamareeb lagu qaban doono dhameystirka heshiska Ahlu sunna.
“Waxan rabaa inan idiin Cadeeyo Anaga Ahlu sunna waan la heshiinay,Ahlu usna si dhab ah ayaan ula heshiinay,waxadna marqaati ka tihiin gudoomiyihii golaha guurtiga inan heshiis sax ah la galnay,gudoomiyihii golaha furlinta ahlu sunna heshiis ayan isna la galnay,sadaxda gole gudoomiyayaashooda ayaan la heshiinay maantana ay nasiib u yeesheen inay ka mid noqdeen dowlad gobaleedka Galmudug.Ayuu yiri Madaxweyne Ku Xigeenka Galmudug.
“Laakin waxaa jira heshiiskaasi dad ka xanaaqay oo maqan oo jooga magalada dhuusa- mareeb oo ah walaalaheena aan ka maarmin una baahan inan la heshiino,waxaana idinku bishaareynayaa todobaadka soo socda in magalada Dhuusamareeb uu ka furmi doono saan rajeynayno shir dib o heshiisiineed oo annaga iyo iyaga noo dhaxeeyo”Ayuu sii raaciyay Madaxweyne ku-xigeenka.
Madaxweyne ku-xigeenka Galmudug Maxamed Xashi Cabdi Carabeey ayaa ugu dambeyntii ugu baaqay bulshada Soomaaliyeed ee ka soo jeeda deeganada Galmudug inay Maalgashi ku sameeyaan deegaanadooda,isla markaana ay ka qeyb qaataan Horumarinta Galmudug.
Sawir Qaade:- Abdulkadir Ali Hussein Koronto