Waxaa magaalada Cadaado ee xarunta ku meel gaarka maamulka Galmudug gaaray abaanduulaha ciidanka xoogga dalka Soomaaliya Jeneraal Cali Baashi Maxamed X,Cumar iyo Taliyaha Ciidanka Midowga Afrika AMISOM Jeneraal Cusmaan Nuur Subagle, si loo dardar geliyo hawlaha la dagaallanka Al-shabaab. Safarka labada masuul ayaa sidoo kale, wuxuu salka ku hayaa abaabulka iyo xoojinta Guutada 11 aad ee ciidanka xoogga dalka Soomaaliyeed qaybtiisa ka hawl gasha gobollada Mudug iyo Galgaduud, si guluf xooggan looga qaado haraadiga Kooxda Al-shabaab. Golaha wasiirrada xukuumadda Federaalka Soomaaliya ayaa dhawaan sheegay inay Ciidamada dowladda iyo kuwa Midowga Afrika oo is kaashanaya dalka Ka xoreyn doonaan maleeshiyada Al-shabaab, maaddaama dhawaan lagu wado iney dalka ka qabsoomaan doorashooyinka dadban.
↧