Tartan Cilmiyeedka bisha Ramadaan oo ay si wada jir ah u baahinayaan Radio Muqdisho iyo Telefishinka Qaranka Soomaaliyeed ee SNTV, isla markaana si toos ah looga daawanayo Telefishinka, halka dhageystayaasha ay kala socdaan Idaacadda, uuna taaba gelineyo sanadkii saddexaad Maamulka Gobolka Benaadir ayaa waxaa caawa tartan aad u xiiso badan ku dhexmaray degmooyinka Gaalkacyo Vs Jowhar oo ka kala tirsan Gobolada Mudug iyo Shabeelaha Dhexe, iyadoo labada dhinac ay muujiyeen dadaal iyo anshax wanaag inta uu tartanku socday.
Sida uu xeerka tartanka qabo marka degmo walibo la weydiiyo min afar su’aal waxaa caawa dhextaal u ahaa isbarashada degmooyinka, iyadoo tartamayaasha labada degmo ay ka sheekeeyeen taariikhda ay leeyihiin degmooyinka Gaalkacyo iyo Jowhar iyo waxyaabaha ay caanka ku yihiin.
Natiijada tartankii dhexmaray caawa tartamayaasha degmooyinka Gaalkacyo iyo Jowhar waxey noqotay sidan:-
Gaalkacyo
Tartamayaasha Degmada Gaalkacyo sida xeerka barnaamijka tartan Cilmiyeedka bisha barakeysan ee Ramadaan uu dhigayo waxaa la weeydiiyey Todobo Su’aal, waxaana su’aallihii la weydiiyey ay ka jawaabeen saddex su’aal oo waxa ay iska qaldeen afar su’aal, waxa ay ka faa’iideysteen hal su’aal oo soo hareermartay tartamayaasha degmada Jowhar, waxayna wadarta guud ee dhibcaha tartamayaasha degmada Gaalkacyo ay heleen noqoneysaa 8 dhibcood (Sideed dhibcood).
Jowhar
Tartamayaasha Degmada Jowhar waxaa iyana dhankooda la weydiiyey Todobo Su’aal, su’aallihii la weydiiyey waxay si sax ah uga jawaabeen Saddex su’aal, halka ay iska qaldeen 4 u’aal, mana jirin wax ka faa’iideysi ah oo ay heleen, waxaana wadarta guud ee tartamayaasha degmada Jowhar ka dhigeysaa inay heleen 6 dhibcood (lix dhibcood).
Hadaba kulankii 5aad ee tartan Cilmiyeedka bisha Ramadaan ee Warbaahinta Qaranka caawa waxaa wareega xiga u soo gudbay tartamayaasha degmada Gaalkacyo ee gobolka Mudug, ayadoo gebagebadii ay labada tartame isugu hambalyeeyeen guushaasi, waxaana Guddoomiyaha Guddiga tartan aqooneedka Warbaahinta Qaranka Maxamed Abuukar Ma’da ayaa ugu baaqay ka qeyb galaaysha tartanka inay nidaamka ilaaliyaan iyo sharciyada u degsan, waxaana uu u rajeeyay inay guuuleystaan.
Habeen dambe oo ah habeenka Lixaad ee tartan Cilmiyeedka bisha Ramadaan ee Warbaahinta Qaranka waxaa ku tartami doona degmooyinka Waaberi Vs C/casiis oo ka wada tirsan Gobolka Benaadir.
Sawir Qaade:- Farxaan Suleymaan Daahir