Xildhibaannada Baarlamaanka Federaalka Soomaaliya ayaa kulan ay maanta ku yeesheen magaalada Muqdisho waxa ay akhrinta koowaad mariyeen Hindise Sharciyeedka Maareynta Maaliyadda Dalka ayaga oo dhinaca kalena Akhrinta Seddexaad mariyey Hindise Sharciyeedka Xanaannada Xoolaha.
Guddoomiyaha Baarlamaanka Federaalka Soomaaliya Mudane Maxamed Sheekh Cusmaan “Jawaari” oo khudbad ka jeediyey furitaanka kulanka Baarlamaanka ee maanta ayaa Xildhibaannada ku war geliyey in Ra’isulwasaaraha Xukuumadda Federaalka Soomaaliya Mudane Cumar C/rashiid Cali Sharma’arke uu hor keeni doono Golaha Shacabka maalinta sabtida ah ee soo socota barnaamijka Xukuumadda ee la xiriira doorashooyinka la filayo iney dalka ka dhacaan, waxaana uu dhinaca kale shaaciyey in gebi ahaanba la joojiyey safarradii dibadda ay Xildhibaannada u aadi jireen ka qeybgalka shirarka Baarlamaannada caalamka.
Xildhibaannada Baarlamaanku waxa ay guda galeen ajandaha koowaad oo ahaa wax ka bedelka qodobka 10aad ee Sharciga lagu dhisay Guddiga Madaxa bannaan ee Xuduudaha iyo Federaalka waxaana Guddoomiye ku xigeenka guddiga Arrimaha gudaha iyo amniga ee Baarlamaanka Xildhibaan Daahir Amiin Jeesoow uu Xildhibaannada u sheegay in wax ka bedelka qodobkan ay sabab u tahay mudada xil heynta guddigan madaxa banaan ay ku eg tahay ama la dhammaaneyso mudada Baarlamaanka 9aad ee jira balse loo baahan yahay in loo kordhiyo ilaa sanadka 2020ka.
U codeynta qodobka 10aad ee sharciga dhismaha guddiga Xuduudaha iyo Federaalka ayaa dib loo dhigay kadib markii ay Xildhibaannadu soo jeediyeen tallooyin ku aadan mudada loo kordhinayo xilka.
Dhinaca kale Xildhibaannada Baarlamaanka ayaa akhrinta koobaad mariyey Hindise Sharciyeedka Maareynta Maalliyadda Dalka waxaana Xildhibaannada Baarlamaanka hor yimid oo sharcigaas u keenay Wasiir ku xigeenka Wasaaradda Maalliyadda Mudane Maxamuud Xayir Ibraahin oo isagu Xildhibaannada u sheegay in sharcigan muhiimad weyn ka geysanayo in Soomaaliya laga cafiyo deymaha lagu leeyahay.
Sidoo kale Xildhibaannada Baarlamaanku waxa ay akhrinta Seddexaad mariyeen Hindise Sharciyeedka Xanaannada Xoolaha Dalka kaasi oo mudooyinkan hor yaalay Golaha Shacabka waxaana Guddoomiyaha Guddiga Xanaannada Xoolaha, Beeraha iyo hor marinta reer Miyiga ee Baarlamaanka Xildhibaan Saciid Maxamed Cali oo Baarlamaanka ka hor hadlay uu xusay in sharcigan lagu soo daray tallooyinka ay Xildhibaannadu soo jeediyeen inta lagu jiray akhrinta labaad ee Hindise Sharciyeedkan.
Howsha ugu horeeysa ee Baarlamaanka hada uu wajahayo ayaa ah guda gelidda Barnaamijka Xukuumadda ee la xiriira doorashooyinka dalka ka dhacayo dhamaadka sanadkan 2016.