Qabanqaabada doorashada Madaxweynaha dalka aanu walaalaha nahay ee Djibouti ayaa si xawli ah ku socotay maalmihii la soo dhaafay, waxaana madaxda ugu cad cad ka mid ah Madaxweynaha iminka talada haya Ismaanciil Cumar Geele, oo ah halyeey taariikh wanaagsan ku leh Geeska Africa gaar ahaan ummadda ku hadasha Afka Soomaaliga.
Waxaanu waraysi doorashada Djibouti ku saabsan la yeelanay rug cadaa wax badan la soo shaqeeyay Madaxweyne Geelle, Safiirkii hore ee Djibouti u fadhiyay dalalka Japan, China France, Switzerland, United Kingdom iyo UNESCO. Danjire Rachad Farah ayaa sheegay in madaxweyne Geelle yahay halyeey Afrika ku faani karto,.
“Hoggaamiye waxaa lagu qiimeeyo waa waxqabadka dadkiisa iyo dalkiisa, waxaana taas caddeyn u ah farqiga u dhaxeeya Djibouti shalay iyo maanta, waa wax muuqda halkii aanu joognay 1999 xiligii uu talada qabtay madaxweyne Ismancil” ayuu yiri Danjire Rachad Farah.
Danjire Rachad Farah ayaa yiri “waxaa guulo la taaban karo laga gaaray dhinacyda dhaqaalaha, siyaasada, isdhaxgalka bulshada iyo xiriirka caalamiga ah, waxaa la kobciyay adeegyadii aasaasiga ahaa sida waxabarashada, caafimaadka iyo nabadgelyada”.
“Waxaa la xoojiyay xiriirkii arrimaha dibadda ee Djibouti, taas oo keentay in Djibouti loo furo albaab dhinaca dublamaasiyadda ah, waxaana waddankeenu noqday mid leh saaxiibao fara badan, waxaa dalkeena ku soo batay maalgashadayaasha dalalka shisheeye, taasina waxay keentay in uu kobco horumarka dhaqaale ee dalka” ayuu yiri Danjire Rachad Farah.
Burburkii Soomaaliya kaddib, iyadoo caalamu ka jeestay Soomaaliya ayaa madaxweyne loo doortay Ismancil Cumar Gelle, waxyaabaha lagu xasuusto ayaa waxa ka mid ah in isla markii uu xilka qabtay uu u istaagay Soomaalidii kala irdhaysneyd, isagoo arinta Soomaaliya geeyay Qaramada Midoobay, dabadeedna uu ku casuumay madashii caanka aheyd ee loo yaqiin shirkii Carta, halkaas oo ay ka dhalatay dowladnimada ay Soomaalidu haysato ilaa maanta.
Danjire Rachad Farah ayaa hadalkiisi ku soo qatimay in dalka Jabouti uu u baahan yahay madaxweyne Geelle, waana tan keentay in shacabka iyagu ka dalbadaan in uu isu soo taago doorashada sanadkan 2016 ka.