Diyaarad nooceedu uu yahay BAE 146 oo qaada boqol iyo labaatan qof oo ay leedahay shirkada diyaaradaha ee Daalo, iyo Jubba islamarkaana ay saarnaayeen rakaab ka yimid dalka Djabouti ayaa maanta barqadii ka soo degtay garoonka diyaaradaha caalamiga ah ee Magaaladda Muqdisho,waxaana garoonka ku sugnaa mas’uuliyiinta ,waaxda socdaalka
iyo jinsiyadaha Soomaaliya, Mas’uuliyiinta shirkadaha diyaaradaha Daalo, jubba iyo waaxda duulista hawada Soomaaliya.
Mas’uuliyiinta shirkadani diyaaradaha ayaa sheegay in wixii ka dambeeyay markii la qarxiyay diyaarada ay leedahay shirkada
diyaaradaha ee Daalo iyo jubba oo hakad galay howlihii duulimaad ee ay ka wadeen garoonka diyaaradaha ee muqdisho ay hada howlahooda duulimaad ay dar dar geliyeen maadaama howlaha garoonka muqdisho la horumariyay amaankana si weyn loo adkeeyay.
Kabtanka diyaarada Daalo Goerge Gaplous ayaa sheegay in uu ku faraxsanyahay in diyaarad uu kabtan ka yahay ka howlgasho garoonka diyaaradaha ee muqdisho taasina ay ka dambeysay horumarka laga sameeyay garoonka diyaaradaha ee Muqdisho.
‘’Aad ayaan ugu faraxsanahay inaan sii dar dar gelino howlaha garoonka diyaaradaha ee Magaalada Muqdisho, anagoo taasi uga mahad celineyna maamulka garoonka iyo hay’adaha amaankaba ,taasi shacabka dhoofaya iyo kuwa soo degaya intaba dhiira gelin ayay u tahay ,waxaana sidoo kale aan 100% ku kalsoonahay amaanka garoonka diyaaradaha ee muqdisho’’ Ayuu yiri Kabtankaasi.
Maareeyaha waaxda duulista iyo saadaasha ee Soomaaliya Cabdi Waaxid Sheikh Cumar ayaa sheegay in howlaha duulimaad ee shirkadaha duulimaadyada ay ka wadeen garoonka Muqdisho ay doonayaan in ay horumariyaan.
Kamaal Cabdi Casiis Olol oo ah agaasimaha farsamada ee Shirkada diyaaradaha ee Daalo iyo Jubba ayaa ugu baaqay dadka rakaabka ah in ay mas’uuliyad isa saaraan oo maamulka diyaarada ay dhinaca ammaanka kala shaqeeyaan.
Taliyaha waaxda Socdaalka iyo jinsiyadaha ee Soomaaliya C/laahi Gaafow Maxamuud ayaa sheegay in ay xooga saareen sidii loo adkeyn lahaa amaanka garoonka diyaaradaha ee Magaalada Muqdisho.