Ku dhowaad 200 oo shaqaale oo intooda badan ay Soomaali yihiin, ayaa shaqooyinkooda ka ceyrisay shirkad hilibka soo saarta oo ku taala gobolka Colorado ee dalka Mareykanka kadib markii ay cabasho ka muujiyeen in maamulka shirkadda ay u diideen in ay dukadaan salaada xilliga shaqada sida ay sheegeen Khamiistii la soo dhaafay koox u dooda dadka Muslimiinta ah.
Golaha xiriirka muslimiinta Mareykanka oo loo soo gaabiyo CAIR ayaa sheegay in shaqaalahan maamulka shirkadda CARGIL ay ula dhaqmeen si faquuq ah iyo cunsiriyadnimo ay ku jirto, shirkadan ayaa meel 75 mile u jirta ku taala magaalada Denver dhinaca waqooyi bari kaga beegan.
Jaylani Xussen, oo ah afhayeenka golaha CAIR, ayaa muuqaal uu YouTube soo dhigay waxaa uu ku sheegay in kooxdan shaqaalaha ah ay la kulmeen xanibaan ku aadan gudashada waajibaankooda alle, “taas oo socotay muddo aad u dheer.”
“dhamaan shaqaalaha waxaa ay ahaayeen ku aad u wanaagsan, mana jirin wax kale” ayuu yiri Xuseen.
Waxaana uu intaa raaciyay in muranka uu yimid ka dib markii isbedelo dhanka siyaasadda shaqada ah ay soo rogeen maamulka Cargill kaas oo ku aadan goobta shaqada iyo gudashada salaada.
Mike Martin, oo u hadlay xafiiska shirkadda Cargil ay ku leedahay magaalada Minneapolis, ayaa sheegay in muranka uu yimid markii shirkadda ay wax ka bedeshay shuruucda taas oo aan isbedel lagu sameyn ilaa sanadkii 2009.
“Cargill waxaa ay sameysaa isku day xili kasta ah kaas oo fursado siinaya dadka diintooda si looga fogaado is maandhaaf isla markaana ganacsiga soo saarsita hiilbka shirkadda aan dhibaato ku keeneynin,” ayuu yiri .
Isagoo sidoo kale tilmaamay in sharciyada shirkadda ay yihiin kuwo dabacsan oo shaqaalaha u ogolaanaya in ay salaadooda dukadaan taas oo ku xiran qeybaha ay ka howlgalaan lana xiriira shaqo maalmeedka shirkadda.
Martin ayaa sheegay ku dhowaad 200 oo shaqaale ay ka maqanaayeen shaqadooda muddo sadex todobaad oo xiriir ah isla markaana ay ku guul dareysteen in ay soo wargeliyaan maamulka shirkadda.
Maamulaha shirkadda ayaa la kulmay qaar kamid ah shaqaalaha Soomaalida iyo madaxda ururka shaqaalah kuwaas oo matalaya ku dhowaad 2,000 saacadood shaqaalaha shaqeeya hase yeeshee waa ay ku guuldareysteen in ay xaliyaan muranka soo kala dhexgalay shaqaalaha iyo maamulka shirkadda Cargil.
Kadib markii 190 shaqaaale ay ku guuldareysteen in ay shaqada yimaadaan muddo sadex maalin oo xiriir ah , “ heerka xiliga shaqada ayaa la soo saaray ” waxaana shaqaalahaasi laga ceyriyay shaqadooda waxaa sidaa sheegay, Martin.
Cumar Jamaal , oo ah agaasimaha fulinta gudiga xuquuqul insaanka Soomaalida, ayaa sheegay in maamuliyaasha Cargill aysan fahmin waqtiyada dadka muslimiinta ah ay u baahan yihiin in ay gutaan waajibaadkooda inta lagu guda jiro shaqada.
Jamal ayaa sidoo kale sheegay in ururkiisa uu xiriir la sameeyay shirkadda Cargil hadii shaqaalaha Soomaalida ay shaqadooda dib u heli karaan.
” waxaan ku rajo weynahay, in ay jiri karaan sharciyo cad cad oo u taagan qof kasta in uu xalin karo dhibaatada heysata ,” ayuu mar kale yiri.
Cargill ayaa waxaa u shaqeeya 155,000 oo shaqaale oo ka howlgala 68 wadanka, sida laga soo xigtay website shrikadda.